انا بلطجى ، نعم انا بلطجى ، بلطجى بمفهوم المجلس العسكرى ، بلطجى بمفهوم الداخلية ….
بس انا عايز اعرف الاول التهمه ال اتهمونى بيها تعريفها ايه؟
الناس فاكره ان البلطجى ده يعنى واحد جسمه كبير كده وبينزل الجيم وعنده عضلات ، وفيه ناس فاكره ان البلطجى عنده بشلتين فى وشه لانه -ولحظه العاثر- وقع فى مشكله مع حد سوابق وبلطجى بحق وحقيقى وخد مطوه فى وشه ، فـ تحول بقدرة قادر من ضحيه لبلطجى زيى ال ضربه بالمطوه ….
فى رايى ان البلطجى هو ال بيشيل اى حاجه حاده فى ايديه او جيبه ، من الممكن بيها تهديد الاخريين، وملهاش علاقه بالهيئه ولا بالبس ولا بالجسم ولا اى حاجه من دى …
طيب بالعقل كده ، ايه ال هيخلى بلطجى يضرب فى امن مركزى ، اذا كان هو اصلاً الحاجه الوحيده ال بيخاف منها هو الشرطه وتلاقى الواحد من دول بيقول لاصغر عسكرى يا باشا ويا بيه ، ولو بيشوفهم من بعيد بيلف ويمشى من شارع تانى …
طيب لنفرض جدلاً ان هو مش بلطجى واحد، دول كذ ا واحد ولازم اكيد يكونوا عارفين بعض علشان يعملوا عمل احمق زيى ده ومهاجمه مبنى الداخليه نفسها ، وبالتالى اتحاموا فى بعض الناس – انا بقول لنفرض جدلاً - وهاجموا الداخليه وعملوا شغب … مع ان الكلام ال بقوله ده مش منطقى لان مفيش بلطجيه بيتفقوا على حاجه ابداً بس يلا
المهم ،الاكيد فى الموضوع انهم هيترعبوا بمجرد سماع صوت مدرعه ، لان اى حد فيهم لو اتفتش واتلقى معاه موس حلاقه هيبقى محكمه عسكريه مفيش تفاهم ، فبالتأكيد هيجروا ويهربوا من الصوت اصلاً
حد هيقولى دول فلول ، دول حزب وطنى ، لو فلول وواقفين مع اهالى الشرطه يبقى كتر خيرهم الصراحه ، عملوا الواجب وزياده
محدش والنبى يقولى بلطجيه تانى ، لان الموضوع ده مش هيترد عليه الا بقلة ادب بعد كده ، ويارريت نفكر شويه بعقلنا ...
تعليقات